ГРУПА ОД НАУЧНИЦИ И КОНСТРУКТОРИ ЗАЕДНО СО НАЦИОНАЛНАТА КОМПАНИЈА ЗА ТЕХНОЛОШКИ РАЗВОЈ КАСИК, ЗАБРЗАНО РАБОТАТ НА ВОЗОТ НАРЕЧЕН „МАГЛЕВ“, ОДНОСНО ВОЗ НА МАГНЕТНО ЛЕБДЕЊЕ КОЈ ТЕОРЕТСКИ МОЖЕ ДА ПОСТИНЕ БРЗИНИ И ДО 4.000 КМ/Ч
Човекот речиси отсекогаш бил зависен од превозот и секогаш настојувал да го унапреди со цел побрзо да се стаса до крајното одредиште. Некогаш превозот бил вршен со наједноставните (примитивни) пловила, со камилите, коњите, запрежните коли итн. Потоа се појавуваат големите пловила, бродовите, поточно едрениците и сè така до појавата на паробродот на Фултон и парната локомотива на Стивенсон. Во исто време се појавуваат и автомобилите од најразличен тип и намена.
Во овој текст ќе се задржиме на железничкиот сообраќај, не дека е најевтиниот, туку затоа што во денешно време се издвојува како најбрз и најчист. Oдеднаш возот стана најактуелен и згора на тоа најчист, не загадува, поточно не исфрла ниту чад, ниту каква било прашина и воедно нема загадување од бучава. Тоа е таа магнетна технологија која ниту чади, ниту бучи, а се појави во втората половина од ХХ век. Најдалеку отиде јапонската технологија со нивните возови кои постигнуваа брзини од над 300 км/ч. Токму таа технологија денес добива надградба и во последниве неколку десетлетија, конструкторите настојуваат да ги внесат возовите во цевки со пречник од шест до осум метри. Потоа сакаат во тие цевки да создадат состојба на вакуум и во тие услови да сообраќаат возовите. Наместо класичните шини, возовите кои се движат со помош на магнети „лебдат“ на, да ја наречеме, шина, само што возот не „лежи“ на шината, туку лебди над неа на висина од најмалку еден до најмногу девет или 10 сантиметри. Тоа магнетно лебдење во вакуум простор придонесува возовите да постигнуваат вртоглави брзини.
Пред две години Кина изврши тестирања на воз во природна големина во цевка (тунел) со пречник од околу шест метри, а долг два километри. Без вакуум експерименталниот воз постигнал брзина од 130 км/ч, а две години подоцна, односно годинава некаде во февруари кинеските конструктори во тој ист тунел, успеале да постигнат брзина од дури 620 км/ч и тоа без состојба на вакуум. Како што сега се одвиваат работите со овој вид превоз, кинеската машинерија сериозно работи на целосно усовршување на магнетното ледбење и најавува дека во најскоро време ќе постигнат брзина од дури 1.000 км/ч. Планот е тоа магнетно поле на шината и на возот да биде стабилно, да нема отстапувања (осцилации) во долг временски период, односно додека возот се движи. Тоа ќе изискува и стабилен довод на електрична енергија.
Како возот лебди со помош на магнетното поле? Многу едноставно. Земете два магнети, доближете ги и тие ќе се спојат. Потоа едниот завртете го од другата страна и приближете го до другиот, ќе забележите дека се одбиваат. Минус со плус се привлекува, а истородните полови се одбиваат. Тоа магнетно одбивање всушност го создава лебдењето на возот над „шината“. Побрз е од авионите, нема потреба да брзате на аеродром, а железничките станици најчесто ги градат во централното градско подрачје. Ваквите возови најчесто ги нарекуваат „маглев“ (магнетик левитејшн магнетно лебдење), но и хиперлуп. Според сегашните резултати на кинеските научници и конструктори, нивниот воз е најбрзиот на светот.
Сето тоа сè уште е во експериментална фаза, но наскоро тимот ќе гради 30 километарски тунел (цевка) во кој ќе вршат дополнителни испитувања. Кога сето тоа ќе заврши, Кина ќе тргне кон сериско производство на ова чудо од воз.
На почетокот „маглев“, ќе бидат користени за поврзување на градови со средни растојанија од 500 – 600 км, а потоа ќе бидат поврзувани градови со поголеми растојанија. Првата „хипер пруга“ ќе биде на релација Шангај Хангжоу во должина од околу 160 км воздушна линија. И сето ова без чад и без бучава.
ТОП НОВОСТИ
