ШПАНСКИОТ ТЕМПЕРАМЕНТ ПРЕТОЧЕН ВО LEON FR ВЕРНО ЈА ПРОДОЛЖУВА ТРАДИЦИЈАТА НА БРЕНДОТ ПОЛН СО ЕМОЦИИ. СПАКУВАН СО МНОШТВО НАПРЕДНА ТЕХНОЛОГИЈА, ВОЗНИ КАРАКТЕРИСТИКИ КОИ СЕ ЗАДОЛЖЕНИ ДА ГИ ИСПОЛНАТ ВИСОКИТЕ ОЧЕКУВАЊА НА ЕНТУЗИЈАСТИТЕ И СОФИСТИЦИРАН ИЗГЛЕД, ПРАВАТ ДА БИДЕ ЕДЕН ОД НАЈАТРАКТИВНИТЕ АВТОМОБИЛИ ВО С-СЕГМЕНТОТ.
Се поприсутните кросовери и SUV возила жестоко ги напаѓаат класичните хечбек автомобили кои пополека го губат здивот во оваа битка. За воља на вистината повеќето производители сè уште веруваат дека за нив има место, а во оваа група спаѓа и шпанскиот Seat, кој со новата генерација на моделот „Leon“ докажува дека забавните хечбек автомобили се сè уште релевантен фактор.
ЕВОЛУЦИЈА НА СТИЛОТ
Новата 4-та генерација на Leon е обликувана на начин што се потпира кон еволутивниот пристап на дизајнирање. Причината лежи во тоа што претходната генерација на Leon поседуваше привлечен и спортски екстериер кој беше одлично прифатен од публиката. За да се задржи зацртаниот правец и да се подигне на повисоко ниво работено е во правец за надополнување на индивидуалност. Затоа велиме дека новиот Leon е едно навистина уредно парче дизајн со слободен и забавен карактер што скрива многу мали детали низ целата надворешност споени во една целина која одлично го претставува неговиот темперамент. Печатот на предниот дел кој заедно го создаваат дневните LED светла слични на големиот SUV Tarraco, обликот на поклопецот од моторот и горниот дел од решетката на ладилникот му даваат на моделот Leon визуелен идентитет што го дефинира како ултрамодерен претставник на компанијата. Сликата продолжува одзади каде дизајнерите од Seat додаваат светла лента по целата ширина на задниот дел од автомобилот со прилично возбудлива кореографија. Според спецификациите тестираниот примерок обоен во карактеристична црвена боја поседуваше FR пакет на опременост, што значи дека автомобилот е поставен на поголеми, 18 инчни ,,Performance” алуминимски бандажи, поседува спортски додатоци на долниот дел од каросеријата и ретровизори со сатенски ефект. Вака спакуван Leon изгледа дополнително впечатлив и спортски без тоа гласно да го кажува.
ДИГИТАЛНА ФИЛОЗОФИЈА
За надворешноста велиме дека е инспирирана од претходната генерација, но кога ќе се отворат вратите на новиот Leon ве дочекува комплетно нов пристап на градење и начин на размислување. Уредувањето го следи примерот на новата дигитална филозофија која е креирана од принципалот што воедно подразбира минималистички пристап кон хардверските елементи и максимална употреба на напредна технологија за приказ на сите информации и командување со речиси сите секундарни функции. Затоа пред возачот е поставен голем мултифункционален екран на кој освен стандардните мерачи на брзина и вртежи на моторот може да прикаже целосна карта на навигацискиот систем…
Вториот екран, осетлив на допир има димензии од 10 инчи, наменет е за инфотејмент системот и е поставен високо на централниот гребен, во неговото подножје се поставени т.н ,,слајдери” за подесување на температурата и командување со јачината на звукот од аудио уредот. За жал физички прекинувачи воопшто не постојат, но добро е што за привикнување и управувањето со командите не е потребен подолг период.
Просторот на предниот дел од кабината е извонредно организиран, седиштата иако се со спортски карактеристики и нудат добра потпора во сите правци поседуваат одлични пропорции во кои се седи многу удобно. Патниците на задната клупа го уживаат бенефитот на продолженото меѓуоскино растојание и зголемената севкупна должина на автомобилот, бидејќи речиси целиот дополнителен простор е наменет за подобрување на комфорот за патниците на задниот дел. Габаритот на багажниот дел изнесува 380 литри кои се изведени максимално рационално во однос на ширината и длабочината. Во целина создадена е многу напредна и допадлива внатрешност која ја краси спортска нота што воедно дозволува да се истакне и комфорната страна на Leon FR.
ПРИМЕРЕН СПОРТИСТ
Новата генерација на Leon доаѓа со богата палета на двигатели, бензински, дизелски, „плагин хибрид” и „мајлд хибрид” опции, подготвен да ги задоволи сите вкусови и потреби. Во тестираниот примерок работеше 1.5 литарскиот еTSI турбо бензински агрегат кој покрај сите класични компоненти е збогатен со лесна 48-волтна електро хибридна технологија и мала литиумјонска батерија. Оваа технологија овозможува функција за краткорочно засилување, можност за краткотраен „coasting” и деактивирање на два од четирите цилиндри, сè со цел да се намали потрошувачката на гориво и испуштањето на штетни издувни гасови, а за цело време да не го одвлече вниманието на возачот.
Новиот Leon FR со оваа моторизација го одржува спортското ветување, неговите 150 КС и 250 Нм влечна сила одлично соработуваат со прецизно пресметаниот 7 степен автоматски DSG менувач кој реагира правовремено и со висок степен на агилност.
Во оваа конфигурација Leon FR нуди неколку „модови“ на возање: Eco, Normal и Sport, или, пак, Individual начин на работа преку кој може да се подесат повеќето функции по желба на возачот. За забрзување до 100 км/ч потребни се 8,5 секунди, додека максималната брзина изнесува 216 км/ч. а за цело време потрошувачката изнесуваше 8,2 литри на 100 км. Подвозјето на Leon FR иако е спортски сетирано делува доста рафинирано, дури и со тркала од 18 инчи ги впива нерамнините на патот на начин што не ја нарушува удобноста при возењето. На автопат, на отворен пат или во град, Leon е секогаш подготвен да одговори на предизвикот поставен од возачот следејќи ги зададените команди без поговор.
Новиот Seat Leon FR ги буди сетилата, претварајќи го секојдневното возење во забава со што потврдува дека хечбек моделите сè уште имаат нешто што кросовери и SUV моделите не можат да и го понудат на публиката.
| МОТОР: | ЧЕТИРИЦИЛИНДРИЧЕН ТУРБО БЕНЗИНЕЦ |
| ЗАФАТНИНА: | 1.498 СМ3 |
| МОЌНОСТ: | 150 КС При 5.000 врт/мин. |
| МЕНУВАЧ: | 7 СТЕПЕН АВТОМАТСКИ |
| ПОГОН: | НА ПРЕДНИТЕ ТРКАЛА |
| ОБЕСУВАЊЕ НА ТРКАЛА: | НАПРЕД: MCPHERSON НАЗАД: MULTI LINK |
| СОПИРАЧКИ: | НАПРЕД: ВЕНТИЛИРАЧКИ ДИСКОВИ НАЗАД: ДИСКОВИ |
| ГУМИ: | НАПРЕД 225/40 R18 ПОЗАДИ 225/40 R18 |
| МАСА НА ВОЗИЛОТО: | 1.360 КГ |
| ДИМЕНЗИИ: Д/Ш/В: | 4.368X1.800X1.442 ММ |
| ЗАБРЗУВАЊЕ ОД 0 ДО 100 КМ/Ч: | 8,4 СЕКУНДИ |
| ПРОСЕЧНА ПОТРОШУВАЧКА: | 4.8 Л/100 КМ |
| МАКСИМАЛНА БРЗИНА: | 216 КМ/Ч |
| ЦЕНА НА ТЕСТ МОДЕЛОТ | 25.500 € |
ТОП НОВОСТИ
