МИНАТИТЕ ДВЕ ГОДИНИ ИМАШЕ ПОВЕЌЕ ОДЛУКИ КОИ ВЛИЈАЕЈА НА ОНА ШТО НЀ ОЧЕКУВА ВО МОТО ГП СЕЗОНАТА ВО 2025 ГОДИНА, А ЕДНА ОД НИВ БЕШЕ И ОНАА НА ШАМПИОНСКИОТ ТИМ НА ДУКАТИ ДА НЕ МУ ДАДЕ СЕДИШТЕ НА ХОРХЕ МАРТИН ВО НИВНИОТ ФАБРИЧКИ ТИМ, ПА СЕГА ОСТАНАА БЕЗ „БРОЈОТ 1“
Откако неколку сезони по ред Дукати се наметна како прв тим во мотоциклистичката елита, досегашниот шампион Франческо Бањаја беше детрониран од ривалот кој и минатите години му задаваше најмногу проблеми. Хорхе Мартин е првиот возач во „новата ера“ (откако зафатнината на моторите во „кралската класа“ беше подигната од 500 на 1.000 сантиметри кубни) што стигна до шампионскиот трон со независен тим, поточно екипа без фабричка поддршка, често именувана и како „сателитска“.
Во меѓувреме, Дукати беше исправен пред предизвикот за избор на возачи на средина од сезоната во 2024 година, кога реши дека треба да го смени Енија Бастијанини. Италијанецот пред две години доби предност пред Хорхе Мартин при релативно изедначени резултати, но од тој трансфер неговата кариера имаше надолна линија, првенствено поради повреди. Иако сите очекувања беа дека Хорхе Мартин ќе го добие седиштето, одлуката на поранешниот шампион Марк Маркез да не прифати седиште во сателитски тим, го премисли Дукати, па го ангажираа другиот Шпанец, форсирајќи ја логиката дека „подобро е да го немаш за непријател“.
Априлија го искористи моментот и му понуди на Хорхе Мартин седиште во нивниот фабрички тим, а на крајот на годината тој им го донесе шампионскиот број 1 за 2025 година. Уште еден млад возач од „академијата“ на Валентино Роси, Марко Безеки, ќе му биде партнер во новата сезона, исто така оставајќи зад себе празно седиште во сателитскиот тим на Дукати.
Но, тоа не е единствената загуба на италијанската фабрика, бидејќи загубија партнер и во екипата Прамак со која што Хорхе Мартин стигна до титулата. Имено, од оваа сезона наместо сателитски тим на Дукати, тие ќе бидат под закрила на Јамаха. Ова е особено важно бидејќи во моментов правилата за развој на погонските единици се „замрзнати“, а од 2027 година ќе бидат воведени нови правила и намалување на зафатнината од 1.000 на 850 сантиметри кубни. Претстојат сезони на развивање на тие нови агрегати, па добивање втор тим е најдоброто нешто што Јамаха можеше да го направи за себе, а бонус е тоа што го откина од главниот ривал. Ангажманот на искусниот Џек Милер покрај надежниот Мигел Оливеира прави сликата за овој потег да биде комплетна.
Наспроти Хонда, која остана со Жоан Мир, Јохан Зарко и други помлади возачи, КТМ исто така најави дека сериозно се подготвува. Покрај Бред Биндер и Педро Акоста во првиот тим, во втората сателитска екипа Теч 3 (поранешна на Јамаха), ги доведоа Маверик Вињалес и Енеа Бастијанини, двајца возачи од ривалски фабрички тимови. Со ова, тие се наметнуваат на краток рок како најголем ривал на Дукати, наспроти растечките апетити на Априлија со Хорхе Мартин.
Сезоната почнува на 2 март со трката за Големата награда на Тајланд, а ќе заврши на 16 ноември со Големата награда на Валенсија.
КАЛЕНДАР НА МОТО ГП ЗА 2025 ГОДИНА
| 02.03 ГН Тајланд, Буринам
16.03 ГН Аргентин, Рио Хондо 29.06 ГН Холандија, Асен 24.08 ГН Унгарија, Балатон Парк 19.10 ГН Австралија, Филип Ајленд 16.11 ГН Валенсија, Рикардо Тормо |
ТОП НОВОСТИ
