ДЕВЕТТАТА СЕЗОНА НА ФОРМУЛА Е ВОЕДНО Е ВТОРА ЗА ЕЛЕКТРИЧНИТЕ БОЛИДИ ОД ГЕНЕРАЦИЈА 3, ПА ТЕХНИЧКИОТ КОНТИНУИТЕТ СЕ ОЧЕКУВА ДА ДОНЕСЕ ИЗЕДНАЧЕНИ ДУЕЛИ, ОСОБЕНИ МЕЃУ ТИМОВИТЕ КОИ ЛАНИ ПОКАЖАА НАЈГОЛЕМ ПОТЕНЦИЈАЛ, А ЈА КОРИСТЕА МАШИНЕРИЈАТА НА ЈАГУАР И ПОРШЕ
Ник Касиди од Јагуар се враќа како лидер по првите три трки од новата сезона на Формула Е. Иако возачот на Порше, Паскал Верлен, ја освои првата победа од сезоната во Мексико, Касиди со едно трето место и победа во втората трка возени во Саудиска Арабија го престигна Верлен во генералниот пласман.
Касиди претходно при победата на Верлен во Мексико беше третопласиран, зад ветеранот Себастијан Буеми (лански тимски колега), но никој од нив не успеа како него да биде на подиумот во сите три трки од отворањето на новата сезона.
Би можело да се рече дека успешните квалификации беа клуч за неговиот континуитет, при што уште еднаш се покажа дека Јагуар има на располагање одличен технички потенцијал, па Касиди исто како и минатата година уште од раниот дел на сезоната се етаблираше како кандидат за шампионската титула.
Ова е почеток од соништата, никогаш не сум бил на подиумот, ниту во Мексико ниту, пак, тука. Мислам дека најдобар пласман во претходните шест трки што сум ги возел во Саудиска Арабија ми беше шестото место.
Велам не била досега добра патека за мене и во основа очекував дека ќе се мачам. Како и во секоја трка, треба да се работи напорно од стартот до целта и да се обидуваш да бидеш подобар. Во квалификациите дојдов до полуфиналните дуели и веројатно не бев најбрз, но затоа, пак, во трката мислам дека бев. Се чувствував добро, бев комотен во водството и затоа останав толку долго на врвот, рече Ник Касиди, кој минатата година прејде од сателитскиот тим во фабричкиот тим на Јагуар.
Паскал Верлен од фабричкиот тим на Порше не беше единствениот разочаран во Саудиска Арабија. Актуелниот шампион Џејк Денис, кој го има на располагање истиот агрегат, но вози за екипата на Андрети на крајот од трката се најде тринаесет секунди зад победникот. За негова утеха, во првата трка возена на патеката во Саудиска Арабија, тој беше на подиумот и тоа како првопласиран. На крајот од викендот тој си заминува како четврти во генералниот пласман со 29 поени заостанување зад лидерот.
Задоволен сум што во првата трка освоивме максимум поени, бидејќи во спротивно ова ќе беше мошне тежок старт на сезоната. Шокиран сум од лошиот расплет во втората трка, но тоа се должи на лошите квалификации, но во трката повторно бевме конкурентни и го имавме најбрзиот круг. Имаме многу податоци за анализа за да разбереме зошто не успеавме да бидеме конкурентни во еден круг, рече Денис.
За да биде разочарувањето поголемо, тој во третата трка финишираше како десетти и освои еден поен, но подоцна доби казна од пет секунди заради престигнување при развеани жолти знамиња, и остана без тој поен. Касиди има 56 бода, а зад него се Верлен со 38, Верње со 33 и Денис со 30. Следни во календарот на Формула Е ќе бидат мартовските трки во Сао Паоло и Токио, откако претходно беше откажана предвидената трка во индискиот град Хидерабад, што требаше да се вози во февруари.
ТОП НОВОСТИ
