СО НЕТРПЕНИЕ ЈА ОЧЕКУВАВМЕ ЕСЕНТА НАДЕВАЈЌИ СЕ ДЕКА ЌЕ ИМАМЕ ШАНСА НЕКАДЕ ДА ОТПАТУВАМЕ ЗА ДА СЕ РЕЛАКСИРАМЕ. НО ОЧИГЛЕДНО СОСТОЈБАТА СО ПАНДЕМИЈАТА СО КОРОНАВИРУСОТ И НАТАМУ ЌЕ ГИ ПРОЛОНГИРА ПАТУВАЊАТА ДО ПОДАЛЕЧНИ ДЕСТИНАЦИИ. ТОКМУ ЗАТОА ПРЕКУ ЗБОР И ФОТОГРАФИЈА ВИ ПРЕТСТАВУВА ЗЕМЈИ И ГРАДОВИ КАДЕ ШТО СЕКАКО ЌЕ САКАТЕ ДА ПОМИНЕТЕ НЕКОЛКУ ДЕНА, ПА БАРЕМ НА ОВОЈ НАЧИН ЗА МОМЕНТ ЌЕ ВЕ ОДНЕСЕМЕ ВО НЕКОЕ ИДНО ВРЕМЕ …А ТОГАШ, ЗЕМЕТЕ ГИ КУФЕРИТЕ В РАЦЕ И ТРГНЕТЕ БИЛО КАДЕ САМО ДА Е ВО ЕГЗОТИЧНОТО МАРОКО. ТАМУ НАВИСТИНА ИМА ШТО ДА СЕ ВИДИ И ДА СЕ ДОЖИВЕЕ…
Мароко, прекрасна земја на контрасти, многу често е на списоците за планирани патувања. Овој бисер некои го нарекуваат црвеното Мароко, а други, пак, велат дека тоа е земја во боја на виножитото, каде што црвеникавата пустина, романтичните планини, љубезните луѓе, нереалните свежи оази украсени со палми, море што привлекува со своето синило и разнобојните зачини и нивните мириси ја претвораат оваа земја во фатаморгана чиј шарм навистина опива. Легендата за името Мароко е особено интересна. Имено, Арапите го нарекле Ал Магреб, што значи дека тоа е последна точка на западот каде што заоѓа сонцето затоа што верувале дека Мароко е последна земја во светот.
Мароко се наоѓа во Северозападна Африка. На запад брегот го заплиснува Атлантскиот Океан, а на север Средоземното Море. Негов прв сосед на исток е Алжир, а на југ Мавританија. Тоа е земја со медитеранска клима на крајбрежјето, а во внатрешноста климата е многу поинаква – зимите се многу сурови, а летата топли. Мароко има богата историја. Исламистичките војски тргнале да го освојат Иберискиот Полуостров, а таму античките берберски народи се мешале со арапските и француските новодојдени. Во Мароко се наоѓаат империјалните градови Фез, Мекнес, Маракеш и Рабат, со различни бои и архитектура. Поради убавината и долгата историја некои од нив се запишани во Списокот на УНЕСКО.
Низ целото кралство доминира разнобојност, со прекрасни сцени и волшебни приказни. Најголемиот град Казабланка и Тангиер на север на земјата, исто така, го привлекуваат вниманието на многу туристи што ја посетуваат оваа земја во текот на цела година. Ова е патување во земјата од бајките што ќе го воодушеви секој посетител.
МЕКНЕС, ДРЕВНИ ГРАДОВИ И РИМСКИ УРНАТИНИ
Мекнес е град во северниот дел од земјата, во подножјето на планината Атлас, некогаш главен град на Мароко. Заедно со Фес, Маракеш и Рабат, тој е еден од четирите „кралски градови“, опкружен со најголемиот комплекс на ѕидови во цело Мароко. За разлика од сите други градови во Мароко, овој град нема многу украси на исламската архитектура.
Името го добил по берберското племе Микнас, а стариот град што ја сочинува Медина е на Списокот на светско наследство на УНЕСКО. Маслиновите дрвја доминираат во околината на градот, кој надалеку е познат по гостопримството на жителите – насмеаните луѓе на секој чекор ќе ви понудат чај од нане и марокански ѓаконии.
Прошетката низ Мекнес најдобро е да се започне од Баб ел Мансур. Се смета дека тоа е една од најубавите порти во светот. Градските sидови во империјалниот град имаат 27 влеза, но ниеден не е толку импозантен како Баб ел Мансур. На почетокот на 18 век ја изградил султанот Мулај Исмаил, со помош на архитект што од христијанство преминал во ислам. Овој спектакуларен објект не бил изграден за одбрана, туку за да ги покаже луксузот и моќта на султанот.
Порано плоштадот Ел Хедим беше главна конкуренција на плоштадот Јама ел Фна во Маракеш. Сепак, денес само потсетува на него затоа што е попразен, само со некоја тераса или продавач на килими. Наместо традиционалните марокански производи во медина ќе видите тезги со тренерки, фармерки, патики, секојдневни продукти. Продавачите не се навалентни, а мајсторите на улиците и луѓето од баро- вите ретко обрнуваат внимание на минувачите. Секој си ја гледа својата работа. Изгледа како да живеат во некаков свој посебен свет.
Недалеку од Мекнес, во подножјето на планините Атлас, во долината полна со маслинови дрвја, се наоѓа Волубилис, археолошко наоѓалиште на остатокот од римскиот град што датира од времето кога Мароко било колонија на Римската Империја. Се смета дека неговите урнатини се најдобри римски споменици во Северозападна Африка, поради што во 1982 година се запишани во Списокот на светско наследство на УНЕСКО.
Границите на археолошкиот локалитет од 48 хектари се римски ниски sидови, изградени од 168 до 169 година. Ѕидовите имале околу 40 кули. Јужните и западните делови се изградени на благата падина на ридот, на неколку тераси, а североисточниот дел е изграден на рамно поле и тоа е област од која се протега мрежа на правилни улици. Во центарот на форумот имало бања и базилика. Пронајдени се многу римски споменици што сè уште се заштитени. Остатоците што може да се видат на импресивен начин сведочат за римскиот начин на живеење на овој град. Во средина на комплексот се наоѓа куќата на Орфеј, која претставува голем објект со соби, кои биле дел од големата вила на еден од најбогатите трговци на Волубилис.
Покрај куќата на Орфеј, има и остатоци од бањите на Галиен. Тие биле главните градски бањи што ги обновил царот Галиен. А прекрасните мозаици што се неверојатно зачувани до денес дополнително го зголемуваат впечатокот за локацијата. Зградите се одржувале многу добро сè до 18 век, кога ги урнал султанот Мулаj Исмаил за да ги користи во изградбата на својата палата близу Мекнес.
КОНЗЕРВАТИВНИОТ ФЕС
Најстара империјална престолнина на Мароко, со околу еден милион жители, и покрај тоа што се смета за еден од најконзервативните градови во Мароко (можеби и најконзервативен) привлекува со својата автентичност. Медината на Фес, позната како културен и духовен центар на Мароко, но и како главен град на старите занаети, е основана во 9 век и денес е под заштита на УНЕСКО.
Освен по занаетчиство, Фес е познат и по најстариот универзитет во светот, а тоа е Карауин. Ова познато училиште, кое првично било мала џамија, го основала Фатима Ал-Фихирија во 859 година и со текот на времето Карауин станал место каде што се школувале најучените луѓе и важен центар на исламската духовност во Мароко.
Обиколката на Фес би требало да почне од Баб Бу Џeллуд, голема сина порта што го одделува стариот дел на градот Фес ел Бали од новиот дел Фес ел Жадида. Кога ќе стапнете во Фес ел Бали, како да сте достигнале нова состојба на умот. Тоа е најстара и најдолга трајно населена медина во светот, под заштита на УНЕСКО. Со повеќе од 2.000 тесни улички и премини, медината во Фес е единствена во цело Мароко што ја пресекува река.
За време на прошетка низ овие преплетени и пресечени тесни улички постои голема веројатност да се изгубите, но тоа е шармот. На овој начин имате можност да ја истражите медината, која иако на прв поглед е слична на другите медини во Мароко, всушност е многу поразлична. Се чини дека медината во Фес претставува мал град за себе, место каде што застанало времето. Може да се случи на неговите улици едвај да се разминете со натоварени магариња, сè врие од автентичност и нè враќа во далечното минато.
Тоа, исто така, е најголемата пешачка зона во светот. Многу жители на медината никогаш не ги напуштиле ѕидовите на овој град. Занаетчиските работилници и продавници се редат едни до други. Жителите на медина на традиционален начин ги работат занаетите. Шетајќи низ медина ќе наидете на работилници за изработка на мебел, огледала, дрвени предмети, керамика, грнчарски производи.
Фес е главен град на мароканската култура и лулка на знаењето. Познат е по многубројните медреси, училишта каде што се учи Куранот заедно со другите класични предмети. Имаат важна улога во интеграцијата на студентите од други региони.
Царскиот град Фес е посебен и по кожаротвото бидејќи кожата сè уште е главна одлика на овој град. При посета на некоја работилница за кожа (каде што се штави кожата), уште на самиот влез на посетителот му даваат неколку гранчиња нане, со цел да се потисне силниот и непријатен мирис. Од највисоката тераса на овие работилници се гледа најпрепознатливата слика за Фес – коритата каде што се одвива процесот на штавење. Босите работници со стапалата го месат материјалот околу три часа за да ја постигнат посакуваната мекост. Сè е многу традиционално, така како што се правело во минатото, пред многу векови. Боите се добиваат од природни извори – кедровото дрво се користи за да се добие кафеава боја, афионот за црвена, нането за зелена, индигото за сина, шафранот за жолта… Тука се прават најдобрите производи од кожа – чевли, облека, чанти, додатоци…
ЦРВЕНИОТ МАРАКЕШ
Кралот на мароканскиот туризам претставува комбинација од современите трендови и традицијата. Тука работите изгледаат многу непредвидливи. Во градот се живее со брзо и возбудливо темпо. Улиците во овој град имаат некоја чудна логика. Понекогаш тие се тесни, понекогаш непотребно широки. На прв поглед ќе ви се чини дека е архаичен, кривулест, но исто толку нежен и топол и плени со својата душа и спокојство.
Маракеш е наречен Црвен град заради живописната медина опкружена со големи палми и затоа што неговите бедеми и згради подигнати за време на владеењето на Алмохад биле изградени од црвена глина. Во 2008 година е запишан во Списокот на светско наследство на УНЕСКО. Познатиот плоштад Џема ел Фна е срцето на медината. Во близина се наоѓа џамијата Кутуби од 12 век, со минаре високо 77 метри, подигнато од шпански затвореници. Тука посетителот може да се чувствува како да е во некој од филмовите на Индијана Џонс. На секој чекор некој ќе ве застане, ќе ве убедува дека токму тој може да ја предвиди вашата иднина, да ве спаси од лошите сили, или ќе ви нуди разни тревки, суви цвеќиња, зајачки нозе… Неизбежни се и игрите на акробатите, звуците на кастањети и познатата игра на кобрата. Во неверојатниот хаос во градот, каде што има милион автомобили и мотоцикли, каде што бучавата е огромна, постои оаза на мир. Тоа е е познатата градина Мајорел (Jardin Majorelle). Името го добила по францускиот сликар Jacquese Majorellu, кој го купил овој имот во 1924 година, а подоцна го купил славниот дизајнер Ив Сен Лoрaн. Тој бил особено импресиониран од неверојатната сина боја на фасадите на куќите, која подоцна го инспирирала за многу негови модни креации.
Кога влегувате во градините, се чини дека воздухот се менува и сè околу вас одеднаш е зелено, што е одличен контраст и за очите, под претпоставка дека сè уште сте во црвениот Маракеш. Топла препорака ако еден ден одлучите да го посетите Маракеш. Градината Мајорел
ЕСАУИРА МЕДИНА
По дивиот Маракеш, посетете го Есауира, древно рибарско гратче познато по својот релаксирачки ритам, кој во последниот половина век, откако го посетил Џими Хендрикс, привлекува уметници, хипици и патници што не брзаат.
Ова прекрасно светло и сончево гратче на брегот на Атлантикот ќе ве натера да се вљубите во него на прв поглед. Бидејќи некогаш беше едно од главните пристаништа на Атлантскиот Океан, стариот град сè уште е опкружен со големи бели sидови. Топовите, кои се наоѓаат во нај- високиот дел од градот, наредени едни покрај други, покажуваат дека Есауира бил добро чуван од пиратите. Историјата вели дека Есауира бил окупиран уште од праисторијата и се смета за едно од најдобрите пристаништа на брегот на Мароко бидејќи е заштитено со природен залив што го штити од брановите. Во 2001 година УНЕСКО го прогласи за светско наследство под името Есауира Медина.
Овој прекрасен крајбрежен град е добар пример за фактот дека Мароко не се само арапските медини за кои најчесто се пишува туку е мешавина од разновидни култури и странски влијанија што го направија една од најинтересните земји во светот. Слично на Есаура, и во многу други места се среќаваат ренесансната португалска и колонијална француска архитектура, арапската, хебрејската и берберската култура се наоѓаат на многу други места во оваа северноафриканска земја. Сите заедно, во Есауира, некако успеале да направат совршена мешавина на која туристите едноставно не можат да ù одолеат.
РАБАТ
Рабат е главен град на Мароко, втор по големина. Овој град, всушност, се состои од три поврзани града, Темаре, Рабат и Салеа. Стариот град Рабат е опкружен со sидови и се наоѓа на крајбрежјето. Тука е сместен муслиманскиот центар на градот – медина. Тврдината Казба Удаја се наоѓа на карпа и претставува туристичка атракција затоа што е влез во андалузиската градина и медреса каде што се наоѓа Музејот на Мароко. Исто така, вреди да се посети кулата Хасан, каде што се наоѓаат столбовите, кои всушност се темел на никогаш докрај изградената џамија, која требало да биде најголема во светот. Во непосредна близина се наоѓа мавзолејот на првиот крал на Мароко, Мoхамед V. Во градот се наоѓа и Универзитетот Мо- хамед V, каде што се учи религијата, како и многу други гранки на природните и општествените науки. Најновиот дел на градот го сочинуваат модерни населби со административни и други згради и голем број научни институции.
Ова не е сè што може да посетите во Мароко. Тука е и градот на вечната љубов, Казабланка, медината Тетоуан, Ксар од Аит-Бен-Хаддоуа, националните ресторани во кои можете да ја пробате традиционалната мароканска храна и да го пробате надалеку познатиот чај од нане или Берберскиот чај, мароканските амами во кои ќе уживате… преубави места поради кои вреди повторно да го посетите Мароко. Посетата на оваа убава земја е вистински избор не само за авантуристите туку и за сите што сакаат својот живот да го обојат со вистински бои.
ТОП НОВОСТИ
