Ако некој е познат по своите возила наменети како за на асфалт, така и за надвор од него, тогаш тоа е Субару. Оваа марка најдобро го „испеглала“ тој миг на прилагодување возилата подеднакво да бидат агилни речиси на секаква подлога. За нештата да бидат уште поубедливи Субару отиде чекор понапред и на своите модели додаде наставка „валјдернес“ – од диво да биде уште подиво. Најнапред „аутбекот“ и „крострекот“ ја добија оваа наставка, а потоа и „форестерот“. Разликата меѓу „обичните“ модели и истите со ознака „вајлдернес“ е следнава и не е една туку се повеќе. Каросеријата на возилата наменети за во дивина е подигната, на пример најнискиот дел од каросеријата на „фрестерот“ е 221 мм оддалечен од подлогата, додека тоа растојание кај „форстер вајлдернес“ изнесува 236 мм. Потоа шасијата е зајакната за да издржи поголеми оптоварувања при совладувањето на најразличните терени. И на суспензијата е извршена дополнително доработка и додадени се поинакви пружини и амортизери, а додадени се и посебни пневматици со назнака дека се за скоро секакви временски услови. Тука има уште еден чинител, а тоа е заштитата од удари во подлогата. Сето ова ја прави изведбата „вајлдернес“ поубедлива кога се совладуваат песокливи, земјани, карпести и други предели.
Погонската единица е класика на Субару, боксер мотор со четири цилиндри и зафатнина од 2,5 л. Моторот поседува 180 КС кои се распоредуваат на сите тркала со помош на симетричниот типичен погон за Субару, а за сето тоа се грижи новиот „цвт“ менувач со технологија наречена „линеартроник“. За овој менувач конструкторите велат дека е еден од најнапредните автоматски менувачи. Да нагласиме дека со „линеартроник цвт“ возилото може да влече приколка со тежина не поголема од 1,6 тони. Мора да признаете дека тоа е повеќе од доволно, додека обичниот „цвт“ менувач е „друга песна“, поточно воопшто не е наменет да влече приколка.
Новиот „субару форестер „вајлдернес“ ќе влезе во продажните салони во првите денови од есента, најнапред во САД и останатите држави од континентот, а кон крајот на оваа и наредната година и на европскиот пазар. Сега некој ќе праша зошто Субару веднаш оди на американскиот, а потоа на другите пазари. Тоа е така затоа што тамошниот пазар е најбитен за Субару.
Таму се продаваат најмногу возила од спомнатата марка и затоа производителот му посветува посебно внимание, но не се изоставени ни останатите пазари. Колку за информација, Субару во 2024 год. е прогласен за најсигурно и возило во кое возачите најмногу имаат доверба, втор на тој список е Лексус, а трета марка е Тојота. Новиот „субару форестер вајлдернес“ за првпат беше прикажан на Салонот за автомобили во Чикаго, одржан на почетокот од овој месец.
ТОП НОВОСТИ
