СО 420 КОЊСКИ СИЛИ НА 990 KG, МОДЕРНА ШАСИЈА ОД КАРБОНСКИ ВЛАКНА И ЦЕЛОСНО ПРИЛАГОДЛИВА СУСПЕНЗИЈА „СВЕТЕЦОТ” ПОВТОРНО Е СПРЕМЕН ЗА АКЦИЈА. НО, МЕСТО ДА ГО СПАСУВА СВЕТОТ, НУДИ НЕИЗМЕРЛИВО ЗАДОВОЛСТВО ЗАД ВОЛАН, ПОДЕДНАКВО НА ПАТ И НА ПИСТА.
Сигурни сме дека љубителите на автомобили, посебно оние од постарата генерација, ќе претпостават дека станува збор за главното транспортно средство на јунакот од ТВ серијата „Светецот” која се прикажуваше во 1960-те години со славниот актер Роџер Мур во главна ролја. Се чини дека на Мур, улогата на „Светецот” подеднакво му се залепи како и таа на најславниот таен агент на светот Џејмс Бонд 007. Но, исто како и „Aгентот 007”, и „Светецот” не би бил ништо без неговиот автомобил коj на телевизиските екрани се прослави подеднакво како и неговиот возач. Станува збор за купето Volvo P1800 кое стана заштитен знак на „Светецот”, но и на сите плејбои и џетсетери во тоа време. И не само тогаш. Со внимание скроениот дизајн не му дозволува да замине во автомобилската историја и го прави актуелен дури и денес. Не само како посакуван олдтајмер, туку и како инспирација за нешто побесно, попредизвикувачко и подеднакво посакувано.
За тоа беа свесни и инженерите на Cyan Racing, ново име за поранешниот спортски оддел на Volvo кој постои од 1996 година. Cyan Racing како бренд беше воведен во 2015 година од сопственикот на Volvo, кинескиот гигант Geely. Новиот бренд се прослави во Светскиот куп за сериски модификувани автомобили WTCR каде три години по ред освојува титула. Техничкото умеење и љубовта кон вредните модели од минатото им овозможи, и ги охрабри да се зафатат со создавање на современо издание на култниот P1800. Каков е крајниот резултат на нивните напори следи во редовите подолу.
ВРАЌАЊЕ КОН ОСНОВИТЕ
Минаа точно 60 години откако оригиналниот Volvo P1800 беше претставен на публиката. Во 1960-та година модерното купе тргна да ги освојува купувачите цела година пред Jaguar E-Type, две години пред Ferrari 250 GTO и три години пред Porsche 911. Иако бил подеднакво пркосен како и оваа легендарна тројка неговото производство запрело, а со тоа запрел и континуитетот кого го има легендарната тројка. Токму овие причини биле појдовна точка за инженерите на Cyan Racing. Едноставно сакале да покажат што ќе се случело доколку Volvo го продолжел континуитетот на градба на спортски автомобили и каков спортист би бил Р1800 денес.
Затоа во ера кога технологијата ги преплавува автомобилите: електрификација, автономно возење, поврзаност со интернет, алатки без кои не се може, Cyan Racing одлучува да се врати кон корените. При создавањето на Volvo P1800 Cyan внимателно е пристапено кон дизајнот и инженерингот, прилагодувајќи ги за во денешни услови, но притоа задржувајќи ги основите. Отфрлено е сè што ја спречува директната поврзаност на возачот со патот и што го изобличува возачкото доживување. Модерниот Р1800 нема контрола на стабилноста, нема ABS, нема серво на волан, па ниту серво на сопирачки.
ДА СЕ СОЧУВА КАРАКТЕРОТ
Volvo P1800 Cyan го започнува животот како оригинал Volvo P1800 од 1964 година на чија шасија се направени соодветни модификации за да се добие крутост потребна за напрегањата кои го очекуваат автомобилот на писта. Да се вметне модерна технологија без да се загуби карактерот на оригиналниот Р1800 воопшто не била лесна задача. Факт е дека автомобилите од 1960-те години имаат многу слаби точки и се направени од челик со послаб квалитет кој е подложен на свиткување. Затоа било потребно да се зацврстат слабите точки со цевки и профили од високолегиран челик кон кого е интегрирана каросеријата од карбонски влакна и заштитен кафез од титаниум, со што е добиена шасија со уште поголема структурна крутост. Така е создадена основа за прецизно и интуитивно возачко доживување.
Бидејќи каросеријата е целосно изработена од карбонски влакна направени се одредени измени во интерес на балансот и возната динамика. Како на пример зголемена ширина за поширока трага на тркалата, и отвори за да се постават поголеми тркала. Благо е поместена и кабината со цел постигнување подобар баланс меѓу оските. Сепак, дизајнерите се помачиле да го сочуваат карактерот, па така кога ќе се фрли поглед на P1800 Cyan нема двојби за кого станува збор.
ДОНЕСЕН ДИРЕКТНО ОД ТРКА
Користењето на високолегиран челик во комбинација со карбонски влакна за шасијата и каросеријата допринело тежината на P1800 Cyan да застане на 990 kg. Доволно ниска тежина за постигнување на брутални перформанси поттикнати од навиениот четирицилиндарец донесен директно од трка. Моторот кој надолжно е поставен под хаубата на P1800 Cyan, и ги задвижува задните тркала, е дериват на истиот мотор кој во тркачкиот автомобил Volvo S60 TCI на Cyan Racing му донесе Светската титула во WTCR. Станува збор за 2.0 литарец со турбо натполнење кој е способен да истурка 420 КС при 7000 min- 1 и 455 Nm при 6000 min-1, додека електрониката го ограничува максималниот број на вртежи на 7.700 во минута.
Иако моторот има турбо полнач создаден е линерано да ја испорачува моќноста и вртежниот момент како кај атмосферски мотор. Bез силни удари на моќност кои делуваат неприродно, посебно кога се вози на писта. Моторот е конструиран за високи вртежи, со вртежен момент кој е интуитивно линеарен со притискањето на педалот за гас. Сето ова води корени од трка каде возачите сакаат да имаат совршена контрола над вртежниот момент. Така се зголемува прецизноста при водење низ свијоци, а со прецизноста и возачкото задоволство.
МЕК НА ПАТ, БЕСЕН НА ПИСТА
Вртежниот момент од моќниот дволитарец се пренесува кон задната оска преку петстепен менувач на специјалистот Holinger и карданско вратило од карбонски влакна. Изборот на петстепен менувач паднал намерно за буквално да се доживее механичкото чувство кое го пружал оригиналниот Р1800, но со далеку подобра прецизност при менување и можност за менување на преносните односи зависно од пистата каде се вози. За таа намена целосно е преработена и задната суспензија. Исфрлена е крутата оска на оригиналот и воведено е независно потпирање и диференцијал со ограничено пролизгување со можност за менување на крајниот преносен однос зависно од потребите. На овој начин направен е успешен микс од врвни перформанси на патека со цивилизирано однесување на пат при секојдневно користење.
ШАСИЈА ЗА ЧИСТО ВОЗАЧКО ДОЖИВУВАЊЕ
Комплетно прилагодливата суспензија, и напред и назад, користи компоненти од лесни метали. Тука се двојните водилки од алуминиумска легура и двонасочните амортизери со хидраулика специјално направена од инженерите на Cyan, и со можност за поддесување на компресијата и истегнувањето. Навалувањето на каросеријата го контролираат тубуларните стабилизатори од кои задниот дозволува местење на крутоста во зависност од афинитетите на возачот и патеката каде вози. Се менува дури и соодносот на преносот кај управувањето со што дополнително се влијае на прецизноста при водење низ свијоци.
Едноставно Р1800 Cyan како мисла свртува таму каде што ќе го насочи возачот. Со него може брутално да се влезе во свијок, а сепак да се пронајде апексот и излезот од свијок во рамки на милиметри.
Високото ниво на тракција и прецизност во комбинација со брзиот одзив на управувањето се должи и на контактот со подлогата за кого се задолжени гумите на Pirelli, P Zero, со димензии 245/40 напред и 265/35 назад. Гумите се поставени на ковани бандажи од лесен метал со дијаметар од 18 инчи и централна навртка, како што доликува на спортист. Контролата врз брзината ја превземаат челичните вентилирани и бушени дискови од 362х32 mm напред и 330х25,4 mm назад. Нив ги зафаќаат четириклипни сопирачки клешти кои ги испорачува AP Racing.
Бидејќи не е тркач, туку автомобил наменет за уживање, инженерите ја дотерале шасијата не да постигнува најдобро време по круг, туку да испорача задоволство и возбуда при возење. Секако сето ова има соодветна цена за која во Cyan Racing велат дека се формира според индивидуалните спецификации на клиентот. Па кој милува нека повели.
ТОП НОВОСТИ
