Минатата година, по повод 70 години од првиот направен автомобил, Порше претстави два концепта во спидстер изведба. Годинава тие концепти беа преточени во сериски автомобил „911 спидстер“.
Овој вид изведба е многу специфичен речиси во секој поглед. Штом ќе здогледате поршеов спидстер веднаш в очи паѓа неговото предно стакло бидејќи е пониско. Двата прозорца, исто така, се поинакви отколку кај класичниот кабриолет модел, пократки и имаат типично закривување на задниот дел. Потоа ролбарот, кој е сместен малку над потпирачите за глава, завршува 70-80 сантиметри зад нив губејќи ја висината во капакот на моторот.
Во новиот спидстер овој дел е направен од карбонски влакна, а страните се од полиуретански панели за да се намали тежината. Неговиот покрив, кој е изработен од посебно платно, рачно се подигнува и се спушта, исто како кај првиот спидстер од 1952, односно 1954 година, изведен од моделот „356“. Нема електромотори придружени со автоматика затоа што сето тоа е еднакво на помала тежина.
И менувачот е влезен во манирот наречен минус тежина. Седумстепениот е заменет со шестстепен затоа што е полесен за приближно 4,5 килограми, а да не зборуваме од менувачот „пдк“, автоматскиот со двојна спојка, од кој е полесен за 18 килограми. Така вкупната тежина на најновиот „911 спидстер“ е само 1.465 кг. Првиот спидстер изведен од моделот „911“ премиерно е прикажан во 1987 година на Салонот за автомобили во Франкфурт и една година подоцна
влезе во продажба.
ТОП НОВОСТИ
