Минатиот месец Порше го претстави моделот „911 карера т“. Тоа „карера“ Порше го додаде по победата во 1953 год. во својата класа на трката на издржливост Карера Панамерикана која се возела од граница до граница во Мексико. Тогаш победникот Хозе Сала Херарте Ариано од Гватемала возел „порше тип 550 – шасија бр. 2“. Зборот „карера“ преведен од шпански на македонски означува трка, односно тркач во смисла на професија и активно учество во трки.
Порше за првпат го употребува зборот „карера“ во 1954 год. на моделот „356 а“, односно „356 а карера“. А што е со тоа „т“.? Кај Порше „т“ е кратенка за „туринг“, нешто како секојдневно возење, да се ужива во возењето, во патувањето. Разликата меѓу „911 карера“ и „911 карера т“ е следнава, подмоделот „т“ е полесен затоа што има обичен менувач, потоа има помалку изолација и со тоа „музиката“ од моторот поубаво звучи, тапацирите се обични, не се од тие луксузните, но затоа имаат врвен квалитет. Да не нѐ разберете погрешно, квалитетот на материјалите е „прва а класа“, но се полесни, потенки поедноставни во дезенот, управувањето е подиректно, поспортско, шасијата е пониска за 10 мм, амортизерите се позатегнати, а можно е и тркалата да имаат малку поинаква геометрија итн. Во „911 карера т“ луксузот е отстранет, но затоа има сѐ друго што е потребно во едно спортско купе. Новава „911 карера т“ е полесна за најмалку 40 кг и сега има 1.478 кг.
Погонската единица е типична за моделот „911“ – шест цилиндри под агол од 180 степени, односно боксер со работна зафатнина од 3,0 л. Со помош на турбо полначот, моторот развива 394 КС и постигнува максимален вртежен момент од 450 Нм. До 100 км/ч тргнувајќи од место потребни се 4,5 сек, а показалката од брзинометарот застанува на бројката 295. Сега времињата се други и нема автомобил без електронски помагала, така што ист е случајот и со „911 карера т“, малку електронски исправки во „лежењето на асфалт“, електронски приспособливо подвозје („пасм“), управување на задните тркала итн.
За првпат подмоделот „т“ доби и кабриолет изведба за која треба да платите 156.000 евра, а за класиката 142.000. Ознаката „т“ првпат е ставена на еден модел од Порше во далечната 1968 год.
ТОП НОВОСТИ
