Заедно со неколкуте производители во светот, Мекларен се држи до својата традиција и продолжува да твори во духот на традицијата, колку полесно толку поубаво. Еве ја замената за популарниот „гт“, со слично име, „гтс“, каде тоа „с“ е кратенка за „спорт“, односно „гран туризмо спорт“. Кога веќе ги разјаснивме нештата околу името и кратенката „гтс“ следно за разјаснување е погонската единица. Таа е централно сместена, веднаш зад единствените две седишта, но пред задната оска (задните тркала). Конструкцијата е осум цилиндри во V со работна зафатнина од 4,0 литри. Потпомогнат со двоен турбо полнач, моторот развива 635 КС при 7.500 врт/мин. Кога зборуваме за забрзувањата, доволно е да го спомнеме следниов податок, од 0 до 200 км/ч за 8,9 сек. и крајна брзина од 326 км/ч. Силината од моторот се пренесува на задната оска преку седумстепен автоматски менувач именуван како „ссг“. Сето досега спомнато е многу урамнотежено и складно составено, затоа „мекларен гтс“ според изјавите на конструкторите е едноставен за возење, експлозивен со своите брзински способности, но и стабилен во свиоците и при наглите вртења. Тоа е тоа што еден страстен возач бара од своето спортско купе, да биде лесно, подвижно и брзо, но крајно стабилно во свиоците, односно како да оди по шини. Сето ова купето го остварува во режимот на работа „конфорт“, а да не зборуваме за „спорт“ и „трек“.
Конструкторите велат дека нивното купе „мекларен гтс“ може подеднакво да се вози како на куси така и на долги патувања, напомнувајќи ја удобноста на автомобилот. Суров и жилав спортист, а видно удобен. Неверојатно, зарем не!? На ова мора да го додадеме и следново, а тоа е просторот за товар кој располага со 150 л во предниот дел од автомобилот и дополнителни 420 л помеѓу двете седишта и моторот, односно вкупно 570 л простор за патните торби. Каде сте виделе спортско купе со толку голем простор за багаж?
„Мекларен гтс“ има основа (монокок) направена од јаглеродни влакна. Токму тој материјал му овозможува да биде лесен, да има доволна крутост, особини кои се од голема важност за севкупното однесување на автомобилот, затоа новото купе од Мекларен покажува врвни возни особини во секаков режим на возење.
ТОП НОВОСТИ
