Кога и да се појавел нов модел од Мекларен секогаш предизвикувал посебно внимание кај сладокусците. Овој производител не прави супер купе автомобили за да задоволи вкусови на возачи кои купуваат за престиж во друштво, туку ги прават за вистинските љубители на спортски купе автомобили.
Мекларен најголемо внимание посветува на едноставноста во управувањето и однесувањето на автомобилот при нагли вртења, потоа на ред доаѓа тежината, по неа е цврстината на основата (шасијата), обесувањето на тркалата и нивната геометрија, распоредот на тежината од моторот, шасијата и менувачот и како тие ги оптетеруваат двете оски. Конструкторите од оваа компанија секогаш внимавале на спомнатите нешта и секогаш навиткувањето или штимањето го доведувале до крајно изострени граници. Затоа новиот модел со право може да се нарече дека е вистински наследник на чудото „720 с“ кое беше прикажано на Салонот за автомобили во Женева во 2017 год.
Полесно, побрзо, со поинаква геометрија на тркалата коjа му овозможува на купето „750 с“ да биде „понервозно“ во секој миг од возењето. Секако дека моторот игра голема улога, Меклареновци секогаш се држат до вкупниот впечаток на автомобилот – во секој поглед да биде посебен, а не да се докажуваат со преголеми погонски единици со многу силина. Кај нив сѐ е складно, сѐ е во доменот на нивната филозофија за спортски купе автомобили. „Мекларен 750 с“ има V8 (модел „м 840 т“) мотор со зафатнина од 4,0 литри (позајмен од „720 с“) со двоен турбо полнач. Овој наново доработен мотор поседува 750 КС и 800 Нм вртежен момент или 587 КС на маса од еден тон. Силината се пренесува на задната оска преку менувачка кутија со двојна спојка и седум преноси.
Соодносот тежина – силина е најдобар во класата. На пример соодносот тежина – силина на „ламборџини хуракан“ е 2,55 кг на една коњска сила, „ферари ф 8 трибуто“ 1,99 кг на 1,0 КС, а „мекларен 750 с“ 1,7 кг на 1,0 КС. Не е само до малата тежина, туку како е таа распоредена на двете оски. Сето досега спомнато резултира со, внимавајте сега, од 0 до 200 км/ч за 7,2 сек. односно од 0 до 300 км/ч за 19,8 сек. Кога ова ќе го спакуваме во правец на безбедноста ја добиваме следнава величина, од 100 км/ч до 0 км/ч потребни му се само 30 м, а кога се движи со брзина од 200 км/ч до застанување изминува 113 м. Ете зошто тежината на автомобилот игра преголема улога – многуте килограми му сметаат како на правците, така и во свиоците каде центрифугалната сила игра многу важна улога при исфрлањето на автомобилот од асфалтот. Колку поголема тежина, толку автомобилот е понестабилен во свиоците и толку подоцна ќе застане при наглите запирања. „Сувата“ маса на купето изнесува 1.281 кг, односно 1.389 со сите течности (масла, гориво итн). Наравоучение, не е само до многуте коњски сили. Крајната брзина на „мекларен 750 с“ е 332 км/ч, а кога ќе се обиде да постигне брзина од 100 км/ч, потребни му се само 2,78 сек.
Иако неколку делови се позајмени од претходникот („720 с“): монококот од јаглеродни влакна, 4,0 литарскиот V8 турбо мотор, хидраулично обесените тркала, сепак истите се дополнително доработени и до перфекција усогласени, „изострени“.
Производителот нуди две изведби, класично купе и современ спајдер, а тоа современ значи покривот не е платнен, туку тврд и со помош на електромотори се извлекува или вовлекува зад двете седишта. Спајдерот е малку потежок и за 0,1 до 0.2 секунди поспор во забрзувањата, но затоа е поскап за околу 10 отсто од класичното купе кое ќе биде ваше за стандардни 300.000 евра (околу). Како што потврдуваат официјалните извори, новиот модел е најлесен и најбрз од сите досегашни сериски автомобили излезени од Мекларен.
ТОП НОВОСТИ
