Светот е толку многу зафатен со електрифицирање на моторните возила што не приметува ни најобични нешта како на пример, нивната тежина. Батеријата е таа која ја зголемува тежината на електричните возила и потоа се чудат зошто возилото минува малку километри, но уште е полошо за останатите делови кои страдаат поради големата тежина. Да не одиме во детали кои делови страдаат од преголемата тежина, туку да се свртиме кон компанијата Лонгбоу Моторс на чело со Даниел Дејви, Џени Кеис и Марк Тапскот, сите ветерани кои минал низ погоните на: БЈД, Полстар, Тесла, Луцид Моторс.
Сосема новиот производител на автомобили тргна во војна со килограмите на електричните возила и нивниот прв обид е повеќе од успешен. Сместена во Лондон, компанијата Лонгбоу Моторс наскоро ќе отпочне со производство на еден автомобил во две изведби, роудстер и спидстер, се разбира двосед. На прв поглед тежината би требала да биде некаде околу 1,5 тони, но умешните конструктори ја имаат сведено дури под 900 кг, односно точно 895 за спидстерот и скоро 995 кг за роудстерот. И да, во нив има електромотор и батерија со приклучок за полнење. Како им успеало од електричен автомобил да симнат толку многу килограми кога еден просечен автомобил од таа класа со класичен мотор не може да постигне тежина под 1.000 кг. Средната тежина на „мазда м икс 5“ (2025) е 1.050 кг, а конструкторите од Ланча пред 23 години приредија светска премиера во Франкфурт на концептот „ланча фулвиа“ и тогаш нагласија дека тежината и на концептот и на серискиот модел е и ќе биде под 1.000 кг, односно 990 кг со 1,8 л мотор. Денес ја имаме истата тежина, но со електричен мотор и батерија. Секоја чест на конструкторите од Лонгбоу Моторс.
Нивниот автомобил е именуван како Лонгбоу, односно „лонгбоу роудстер“ (класично затворено купе, двосед) и „лонгбоу спидстер“ купе но без ветробранско стакло и покрив.
Впрочем такви се вистинските спидстери (или имаат сосема мало ветробранско стакло кое повеќе игра улога на украс отколку што има употреблива вредност). Со должина од само 3,75 м, ширина 1,98 м и висина од точно 1,0 м, спидстерот претставува некој вид ремек дело – 322 КС извадени од средишно сместен мотор кој ја задвижува задната оска. Максимален вртежен момент од 499 Нм гарантира молскавични забрзувања, така што за 85.000 фунти добивате 3,5 сек од 0 до 100 км/ч и автомобил рачно произведен во само 150 примероци. Истата „судбина“ ја дели и роудстерот со тоа што е поевтин, 65.000 фунти, но забрзувањата и производството (150 примероци) се исти. Сето ова гарантира брза распродажба на уникатниот автомобил (или можеби веќе е распродаден). Производителот не кажува каква батерија користи возилото, но не ја исклучи можноста да се појави и изведба со два мотори, најверојатно мисли на погон на сите тркала.
ТОП НОВОСТИ
