Само што не влегла во продажба долго очекуваната „панда“. Обликот потсетува на тој кутијастиот што беше на оригиналната „панда“, само што не е тоа тоа. Има повеќе детали кои се испуштени од првичната „панда“, а всушност требале да бидат вткаени во новиов модел (нешто како што направи Рено со легендарната „петка“). Сепак дизајнерите и челниците не мислеле така и сега новава „панда“ е некако поинаква во обликот и повеќе личи на „џип авенџер“, отколку на оригиналната „панда“. Правена е на платформата наречена „смарт кар платформ“, која веќе ја има во: „цитроен ц 3“, „џип авенџер“, „опел корса“, „пежо 208“ и „донгфенг бокс“.
Најверојатно „пандата“ ќе биде замена за два модели, едниот секако е „панда“, а другиот е „пунто“, затоа што димензиите на моделот „пунто“ се скоро исти со овие на новата панда – должина 3.999 мм, ширина 1,76 м, висина 1,59 м и меѓуоскино од 2,54 м. Одделот за товар е во рамките на класата, 412 л за хибридната изведба, додека електричната има на располагање 361 л од причина што батеријата има потреба од повеќе простор за складирање.
Една хибридна изведба и една целосно електрифицирана. Првата има мотор со три цилиндри со зафатнина од 1,2 л. Поседува 101 КС и максимален вртежен момент од 205 Нм, додека електричната изведба има 12 КС повеќе, но е поспора во забрзувањето и крајната брзина (132 км/ч), бидејќи има 217 кг повеќе. 0 – 100 км/ч за 11 сек во споредба со 10 сек од 0 до 100 км/ч и 132 км/ч во споредба со 160 км/ч.
Електричната ќе биде поскапа од хибридната, а кога веќе зборуваме за цените да нагласиме дека новата „панда“ со основниот пакет опрема („поп“ + хибриден погон) ќе чини околу 19.000 евра, а најскапата во себе има пакет на опрема „ла прима“ и за неа ќе треба да издвоите околу 25.000 евра. Скромен семеен автомобил за денешни услови, а за младите возачи новата „панда“ ќе послужи како возило за секојдневна забава. Е сега дали цената е висока, тоа ќе видиме колкав ќе биде одзивот на потенцијалните купувачи кога „гранде панда“ ќе биде пуштена во продажба некаде кон средината од годинава.
ТОП НОВОСТИ
