Му се посреќи на Порше со „панамерата“, лимузина со многу коњски сили плус пет врати. И еве, таа лимузина стаса до третата генерација. Штом Порше претставува нова генерација, тоа значи дека возилото добро поминува со продажбата. Третава генерација не се одликува со големи надворешни измени во обликот. Има по некоја нова линија, но тоа е сѐ. Повеќе наликува на обновување на обликот, отколку на нешто ново. Сепак во кабината и под капакот од моторот има повеќе измени, односно значителни подобрувања. Бидејќи е зголемена побарувачката за хибридите, Порше во новата „панамера“ вградува четири такви погонски единици. Најнапред ќе го пушти во промет најснажниот со бензински 4,0 литарски турбо V8 мотор кој знаедно со електромоторот имаат дури 680 КС и 930 Нм. За преносот на силината се грижи автоматски менувач „пкд“ со двојна спојка и осум брзини. Од 0 до 100 км/ч потребни му се 3,2 сек, со тоа што може да измине скоро 100 км движејќи се само на струја. На почетокот во понуда ќе биде и класиката, чист ото 2,9 литарски V6 турбо мотор со 353 КС. Со овој мотор „порше панамера III“ постигнува крајна брзина од 272 км/ч и 100 км/ч за 5,1 сек. За основната изведба ќе треба да издвоите 107.810 евра, додека за таа со 680 КС, скоро 200.000.
Досега Порше имаше подизведба наречена „спорт туризмо“, односно еден вид караван, но како што најавија од фабриката, во третата генерација оваа подизведба нема веќе да се произведува, најверојатно поради многу малата продажба.
ТОП НОВОСТИ
