ПОСЛЕДНИТЕ НЕКОЛКУ ГОДИНИ, 15-ТИНА СИГУРНО, ВЛИЈАНИЕТО НА ЗАПАДНАТА КУЛТУРА СЕКАКО ДЕКА ПРИДОНЕСЕ НА 14 ФЕВРУАРИ ДА СЕ ПРОСЛАВУВА И ДЕНОТ НА ЉУБОВТА. НЕМА СОМНЕВАЊЕ ДЕКА СВЕТИ ВАЛЕНТИН ПОВЕЌЕ ГО СЛАВАТ МЛАДИТЕ, НО СИМБОЛИЧНО – ДРУГОТО Е МАРКЕТИНШКИ ПОТЕГ, НАЈМНОГУ НА ТРГОВЦИТЕ. ЗА РАЗЛИКА ОД НЕГО, СВЕТИ ТРИФУН СЕ ПРОСЛАВУВА УШТЕ ВО ДАЛЕЧНОТО МИНАТО И СОГЛАСНО ТРАДИЦИЈАТА, ЛОЗАРИТЕ НА ОВОЈ ДЕН ГИ ЗАКРОЈУВААТ ЛОЗЈАТА, ПРВПАТ ВО ГОДИНАТА, СО НАДЕЖ ДЕКА СВЕТИТЕЛОТ ЌЕ ПОМОГНЕ ГРОЗЈАТА ДА БИДАТ СЛАТКИ, А БОЧВИТЕ ПОЛНИ СО ВИНО.
И покрај тоа што на 14 февруари се води полемика меѓу граѓаните за двата празника, кој да се слави, теолозите постојано нè потсетуваат дека и Свети Трифун и Свети Валентин е всушност дел од христијанската религија, дека и обајцата се уважени, само што култот е инаков. Професорот на Православниот богословски факултет Ратомир Грозданоски еднаш го разјасни прашањето за двајцата светители, парафразирајќи дека не треба да се прават какви било поделби меѓу православците и католиците, ниту пак треба да се спори за тоа кој кого и што слави. Демек, ако си православен човек, припадник на православната христијанска вера, немаш право да го прославуваш Свети Валентин, а штом си припадник на западната, римска христијанска вероисповед и заедница, не треба да знаеш за Свети Трифун. Јасно е сè, ни светителите ни празниците ни верите не се проблем, туку ние, обајцата се жртвувале за другите, водени од љубовта кон Христа, биле мачени, а на крајот и убиени за него. Живееле во третиот век, тогаш се убивало за проповедање на христијанството.
Свети Трифун се родил во Фригија. Бил гускар. Им помагал на сите, уште од мал. Господ го наградил за добрината со моќ да ги исцелува не само луѓето, туку и животните и растенијата, овошните, зеленчуковите градини, житните полиња, лозјата… Во меѓувреме ја излекувал и царевата ќерка. Богатството кое го добил на дар, како благодарност, им го разделил на сиромасите. Продолжил со својата мисионерска дејност, а кога се сменил владетелот, по негова наредба му ја отсекле главата бидејќи држел проповеди на 14 февруари. Денес, во согласност со традицијата, се закројуваат лозјата, се прскаат малку со света вода. Според верувањата, светителот на овој ден забодува факел во земјата по што започнува да се топи снегот. Мнозина сметаат дека со празникот се врзува и почетокот на пролетта, кога природата се буди. Со неа и љубовта меѓу луѓето.
Свети Валентин, пак, живеел во Италија. На христијанството целосно му се посветил уште во раното детство, проповедајќи го. Не се плашел од никого, ништо…, па дури и кога го викнале да оди на суд во Рим го мачеле и го погубиле на 14 февруари (според Католичката црква), откако и таму проповедал. Неговото име, Македонската православна црква го слави во лето, на 12 август.
Деновиве скоро и да нема дуќан, кафуле што не потсетува и на двата празника, надвладува црвената бојата на љубовта, но и на животот генерално, вклучувајќи ги емоциите, енергијата, здравјето, младоста… Дел од нивните декори се и украсите во форма на срце. Забавата се подразбира. Длабоката емотивна наклонетост, силното чувство кон некого, без да се двоумите прославете ја и вие, а во тоа име наздравете со вино. Ако имате можност, придружете им се и на лозарите утрото на 14 февруари е резервирано за обредно закројување на лозјата. И продолжете… Се разбира, да ја славите љубовта.
ТОП НОВОСТИ
